बिहिबार, चैत २७, २०७६
GokarnaNews

दिल्ली हिंसामा मृतकको संख्या २२ पुग्यो, मुख्यमन्त्री केजरीवालले गरे सेना परिचालनको माग

दिल्ली हिंसामा मृतकको संख्या २२ पुग्यो, मुख्यमन्त्री केजरीवालले गरे सेना परिचालनको माग

दिल्ली– भारतको राजधानी दिल्लीमा भड्किएको हिंसाका क्रममा ज्यान गुमाउनेको संख्या २२ पुगेको छ । भारतीय सञ्चारमाध्यमले बुधबार मारिनेमा भारतीय अनुसन्धान निकाय सीआईबीका एक अधिकारी समेत रहेको जनाएको छ । सीआईबीका सूचना सहायक अंकित शर्माको शव दिललीको हिंसाग्रस्त चन्दबाग क्षेत्रमा फेला परेको जनाइएको छ ।

प्रदर्शनका क्रममा सोमबार भारतीय प्रहरीका हेड कन्स्टेबल रतन लालको पनि ज्यान गएको थियो । उनलाई शहिद घोषणा गरिएको छ ।
बुधबार बेलुकीसम्म दिल्लीका ठाउँठाउँमा झडप भइरहेको भारतीय सञ्चारमाध्यमले जनाएका छन् ।

भारतका छिमेकी मुलुकमा पीडित भइरहेको भनिएका हिन्दुहरुलाई समेत नागरिकता दिने विवादास्पद विधेयकको विरोध र समर्थनमा मानिसहरु सडकमा ओर्लिएका हुन् । प्रहरी र प्रदर्शनकारीबीच ठाउँठाउँमा झडप भएको बताइएको छ । प्रदर्शनकारीले सडकमा राखिएका गाडी, पसलमा आगजनी गरेका छन् ।

प्रदर्शनकारीले प्रहरीमाथि ढुंगामुढा गरेका छन् भने प्रहरीले प्रदर्शन नियन्त्रणका लागि अश्रुग्यास, पानीको फोहोरा र लाठिचार्ज गरेको छ ।
प्रदर्शनलाई नियन्त्रणमा लिनका लागि थप ८ हजार प्रहरीसहित अर्धसैनिक बल समेत परिचालन गरिएको छ । त्यसबाहेक सरकारले ५ जना वरिष्ठ प्रहरी अधिकारी हेरफेर गरेको भारतीय सञ्चारमाध्यमले जारी गरेका समाचारमा जनाइएको छ । प्रशासनले प्रदर्शनबाट सबैभन्दा धेरै प्रभावित क्षेत्रहरुमा कफ्र्यु समेत जारी गरेको छ ।

यता भारतीय प्रधानमन्त्री नरेन्द्र मोदीले शान्ति कायम गर्नका लागि आह्वान गरेका छन् । उनले ट्वीट गर्दै दिल्लीका दाजुभाई दिदीबहिनीहरुलाई शान्ति र भातृत्व कायम गरी अवस्थालाई सामान्य बनाउन आह्वान गरेका छन् ।

अर्कोतर्फ दिल्लीका मुख्यमन्त्री अरविन्द केजरीवालले दिल्लीको स्थिती नियन्त्रणका लागि सेना परिचालन गर्न केन्द्र सरकारसँग माग गरेका छन् । उनले प्रहरीले शान्ति व्यवस्था कायम गर्न नसकेको भन्दै सेना परिचालनको माग गरेका हुन् ।

सम्बन्धित समाचारहरु

वडा समाचारहरु