सोमबार, असार २२, २०७७
GokarnaNews

डडेल्धुरा अस्पतालमा चिकित्सक अभाव, बिरामीलाई सास्ती

डडेल्धुरा अस्पतालमा चिकित्सक अभाव, बिरामीलाई सास्ती

डडेल्धुरा– संघीय सरकारको मातहतमा रहेको डडेल्धुरा अस्पतालमा दरवन्दी अनुसार चिकित्सक नहुँदा बिरामीहरु समस्यामा परेका छन् । कर्मचारी समायोजनले डडेल्धुरा अस्पताल चिकित्सक विहीन बन्दै गएको हो । अस्पतालमा प्रर्याप्त चिकित्सक नहुँदा अस्पतालको सेवामा समेत प्रभाववित भएको छ ।

विशेषज्ञ सहितको सुविधा उपलब्ध हुने भनिए पनि अस्पतालमा दरबन्दी अनुसार चिकित्सक नहुँदा सेवा प्रभावित भएको हो । अस्पतालमा प्रर्याप्त चिकित्सक समेत नभए भन्दै सेवाग्राही ज्ञानेन्द्र ताम्राकारले डडेल्धुरा अस्पताल नाम मात्रको विशिष्ट अस्पताल भएको बताए ।

“एक महिना अगाडि मेरी श्रीमती पनि सुत्केरी भएकी थिइन् तर, यहाँ सेवा नहुँदा उनी तराईमा गएर सुत्केरी भइन्,” ताम्राकारले भने, “उपचारका लागि बाहिर जानुपर्दा समस्या हुने गरेको छ । यो अस्पतालको नाम मात्रै विशिष्ट छ, जुन सेवा सुविधा पाउनुपर्ने हो त्यो पाइँदैन । बिरामी आउँछन् नाम लेखाएर रिफर भएर जान्छन् ।”

अस्पतालका लागि १ सय ८ जनाको दरबन्दी स्वीकृत भएपनि ३७ जना कर्मचारीकोे मात्र पदपूर्ति भएको छ । बाँकी ७१ पद रिक्त छन् । त्यस्तै, अस्पताल विकास समितिबाट ४२ जनाको पद स्वीकृत हुनुपर्नेमा ३४ जनाको पदपूर्ति भई आठ जनाको पद रिक्त छ ।

अस्पतालमा अहिले करारका ४५ जना र ज्यालादारीका सातजना कर्मचारी कार्यरत छन् । अस्पतालमा २० जना विशेषज्ञ चिकित्सकको दरबन्दी छ तर, अहिले अस्पतालमा छात्रवृत्ति करारबाट एकजना र अस्पताल विकास समितिबाट दुईजना गरी तीनजना मात्र विशेषज्ञ चिकित्सक कार्यरत छन् ।

अस्पतालमा १९ जना मेडिकल अफिसरको दरबन्दी रहेकामा हालसम्म नौ जना नेपाल सरकारको तर्फबाट र एकजना करारमा गरी जम्मा १० जना मात्र कार्यरत रहेको देखिन्छ । त्यसमध्ये छजना अध्ययन तथा असाधारण विदामा रहेको अस्पतालले जानकारी दिएको छ ।

बाँकी रहेका चारजनामध्ये पनि तीनजनाको समायोजन भएपछि अस्पतालमा अहिले एकजना मेडिकल अफिसर मात्र रहेको अस्पतालका सूचना अधिकारी टंकप्रसाद पन्तले बताए ।

“यो अस्पताल सङ्घको मातहतमा रहँदा पनि दरबन्दीअनुसार चिकित्सक नपाउँदा सेवा दिन अप्ठ्यारो भइरहेको छ,” उनले भने, “एकजना मात्र स्थायी र तीनजना करारका डाक्टर भएकाले उपचार पद्धति कसरी अगाडि बढ्ने हो अन्योल छ ।”

चिकित्सक अभावमा डडेल्धुरा अस्तालमा सञ्चालनमा आइरहेका सेवाहरु समेत बन्द भएको छ ।

सम्बन्धित समाचारहरु

वडा समाचारहरु