आइतबार, फागुन ११, २०७६
GokarnaNews
OnlineKhabarHub

काठमाडौंका मिठाई पसलमा सरकारी अनुगमन, मिठाईको गुणस्तर जाँच

काठमाडौंका मिठाई पसलमा सरकारी अनुगमन, मिठाईको गुणस्तर जाँच

काठमाडौं– चाडबाड नजिकिँदै जाँदा सरकारले बजार अनुमगनलाई पनि तीव्रता दिएको छ । कृषि विकास मन्त्रालयको अग्रसरतामा बुधबार काठमाडौंका विभिन्न मिठाई पसलहरुमा अनुगमन गरिएको हो ।

दशैं, तिहारजस्ता चाँडपर्वलाई लक्षित गरेर कृषि राज्यमन्त्री रामकुमारी चौधरी नेतृत्वको सरकारी टोलीले काठमाडौंको त्रिपुरेश्वरस्थित आँगन, गुलाब र सजन गोथ मिठाई पसलको अनुगमन गर्‍यो ।

गुणस्तरीय खाद्य वस्तुको उत्पादन र बिक्री वितरणका लागि सम्बन्धित निकायलाई सचेत गराउन बजार अनुगमनको कामलाई तीव्रता दिइएको कृषि राज्यमन्त्री चौधरीले जानकारी दिइन् ।

उनले अनुगमनको क्रममा तीन वटै पसलहरुको व्यवस्थापकीय पक्ष कमजोर देखिएकाले उनीहरुले उत्पादन गरेका मिठाई र मिठाईका परिकारहरुको गुणस्तर जाँचका लागि खाद्य प्रविधि तथा गुण नियन्त्रण विभागमा पठाइएको जानकारी दिइन् । सरकारले सबै खाद्य वस्तु उत्पादन तथा बिक्री वितरण केन्द्रहरुमा अनुगमनको कामलाई तीव्रता दिने योजना बनाएको छ ।

खाद्य प्रविधि तथा गुण नियन्त्रण विभागकी महानिर्देशक मनिता वैद्यले खाद्य वस्तुको गुणस्तरीयता र स्वच्छता कायम गराउन बजार अनुगमनको कामलाई जोड दिइएको बताइन् । उनले अनुगमनका क्रममा सरसफाइमा धेरै कमजोरी भेटिएको पनि बताइन् । मिठाई पसलमा प्रयोग गरिएका घ्यू, रंगको गुणस्तरीयतामाथि प्रश्न उठेकाले त्यसको परीक्षणका लागि लगिएको विभागले जनाएको छ ।

यसैबीच, खाद्य प्रविधि तथा गुण नियन्त्रण विभागले अनुज्ञा–पत्र लिएर मात्रै खाद्य वस्तुको बिक्री वितरण गर्न व्यापारीहरुलाई निर्देशन दिएको छ । विभागकी महानिर्देशक वैद्यले अनुज्ञा पत्र लिएर मात्रै खाद्य वस्तुको बिक्री वितरण गर्न सम्बन्धित सबै निकायलाई सचेत गराइएको जानकारी दिइन् । सरकारले खाद्य वस्तुको गुणस्तरीयता र स्वच्छता कायम गराउन बजार अनुगमनका लागि काठमाडौं उपत्यकामा मात्रै दैनिक नौ वटा टोली परिचालन गर्दै आएको बताएको छ ।

 

सम्बन्धित समाचारहरु

वडा समाचारहरु

//onemboaran.com/afu.php?zoneid=2767382