ट्रम्पले तालिबानसँगको वार्ता रद्द गरेपछि तालिबानको चेतावनी: ‘अमेरिकाले धेरै गुमाउन पर्ने छ’

ट्रम्पले तालिबानसँगको वार्ता रद्द गरेपछि तालिबानको चेतावनी: ‘अमेरिकाले धेरै गुमाउन पर्ने छ’

एजेन्सी –अमेरिकी राष्ट्रपति डोनाल्ड ट्रम्पले आफूसँग हुँदै आएको वार्ता तथा भएको सहमति रद्द गरेपछि तालिबान आक्रोशित भएको छ ।

अफगानिस्तानमा हिंसात्मक गतिविधि गर्दै आएको तालिबानले अमेरिकालाई चेतावनी दिँदै भनेको छ कि–वार्ता रद्द गर्दा अमेरिकालाई नै घाटा हो, उसले धेरै कुरा गुमाउन पर्ने छ ।

अफगानिस्तानमा विगत १८ वर्षदेखि जारी युद्ध अन्त्यको प्रयासमा भएको वार्ता प्रक्रिया तथा ती वार्ताबाट भएको भनिएको सहमतिलाई अन्तिम रुप नदिई अमेरिकी राष्ट्रपति ट्रम्ले रद्द गरेका हुन् ।

तालिबानले प्रतिक्रिया स्वरुप जारी गरेको वक्तव्यमा अन्तिमसम्म वार्ता राम्रो रुपमा अघि बढिरहेको र अचानक ट्रम्पले रद्द गरेको उल्लेख छ ।
अमेरिकी राष्ट्रपति ट्रम्पले अमेरिकी समय अनुसार शनिबार राति शृङ्खलाबद्ध ट्वीट गरेर तालिबानसँगको वार्ता तथा भएको भनिएको सहमति रद्द गरेका थिए । उनले क्याम्प डेविडमा आइतबार हुने भनिएको तालिबानका शीर्ष नेतासँगको गोप्य वार्ता पनि रद्द गरेका हुन् ।

अफगानिस्तानको राजधानी काबुलमा भएको आक्रमणको जिम्मा तालिबानले लिएपछि वार्ता तथा भएको सहमति रद्द गरेको ट्रम्पले जनाएका हुन् । सो आक्रमणमा एक अमेरिकी सैनिकको निधन भएको थियो ।

तालिबानसँगको वार्तामा अमेरिकाको तर्फबाट नेतृत्व गरेका अफगानमूलका अमेरिकी कूटनीतिज्ञ जल्मय खलिलजादले गएको सोमबार टेलिभिजन अन्तर्वार्ताको क्रममा सहमतिबारे बताएका थिए । सो सहमतिमा राष्ट्रपति डोनाल्ड ट्रम्पबाट अन्तिम स्वीकृति मिल्न बाँकी थियो, त्यसकै लागि आइतबार तालिबानका नेतासँग उनको भेट हुने तयारी थियो । तर सो भेटअघि नै ट्रम्पले सहमति रद्द गरेका हुन् ।

रद्द भइसकेको सहमति अनुसार अमेरिकाले २० हप्ताभित्र अफगानिस्तानबाट आफ्ना ५४ सय सैनिक फिर्ता लैजाने थियो । खलिलजादले सहमतिबारे टेलिभिजन अन्तर्वार्तामा जानकारी दिइरहेका बेला अफगानिस्तानमा ठूलो बिस्फोट भएको थियो ।

खाडी देश कतारमा नौ चरणमा भएको वार्तामा अमेरिका र तालिबान सहमतिमा पुगेको खलिलजादले टोलो न्युजलाई दिएको अन्तर्वार्तामा बताएका थिए । अमेरिकाले सेना फिर्ता लैजाने तथा तालिबानले अमेरिकी तथा उसका सहयोगीमाथि आक्रमण नगर्ने सहमति बनेको थियो । तालिबानले पनि खलिलजादले भनेको सहमति सत्य रहेको पुष्टि थियो । हाल अफगानिस्तानमा झण्डै १४ हजार अमेरिकी सेना छन् ।

तालिबानले सन् २००१ यता अफगानिस्तानका सबैभन्दा बढी क्षेत्रमा नियन्त्रण कायम गरेको छ र अफगान सरकारसँग वार्ता गर्न अस्वीकार गर्दै आएको छ । अफगान सरकार अमेरिकाको कठपुतली रहेको उसको आरोप छ । अमेरिकाले सन् २००१ देखि नै अफगानिस्तानमा आफ्नो सैन्य गतिविधि गर्दै आएको छ ।

तर गएको बिहीबार काबुलमा भएको कार बम आक्रमणपछि अवस्था फेरिएको हो । एक अमेरिकी सैनिकसहित १२ जनाको ज्यान जाने गरी भएको सो आक्रमणको जिम्मा तालिबानले लिएपछि अमेरिकी राष्ट्रपति ट्रम्पले शान्ति वार्ताबाट भएको सहमति रद्द गरेका हुन् । काबुलमा भएको आक्रमणमा अमेरिका नेतृत्वमा नेटो सेनामा रहेका रोमानियन सैनिकको पनि निधन भएको थियो ।

यी आक्रमणले अमेरिकाले शान्ति वार्ता र सहमति गरे पनि अफगानिस्तानमा दैनिक रुपमा हुने हिंसा रोकिने छैनन् भन्ने देखिएको भन्दै विश्लेषकले चिन्ता जताएका थिए ।

सहमति रद्द भएसँगै अमेरिकी सेनाको फिर्ती तत्कालका लागि रोकिएको छ । यस्तै तालिबानको प्रतिक्रियाले अफगानिस्तानको अवस्था थप नाजुक बन्न सक्ने डर बढेको छ ।

Loading...

वडा समाचारहरु

सम्बन्धित समाचारहरु