दोस्रो बिहे गरेर श्रीमान् भागे, गर्भवती श्रीमतीको बिचल्ली

दोस्रो बिहे गरेर श्रीमान् भागे, गर्भवती श्रीमतीको बिचल्ली

पाँचथर– ताप्लेजुङ जिल्लाको सिदिङ्बा गाउँपालिका–४, साब्लाखुका एक युवकले श्रीमतीलाई गर्भवती बनाएर अर्को विवाह गरी वेपत्ता भएका छन् । अन्तरजातीय विवाह गरेका विजय ताम्लिङ लिम्बूले अर्को विवाह गरी वेपत्ता भएपछि उनकी गर्भवती श्रीमती प्रमिला सिवाको बिचल्ली भएको छ । पाँचथरको याङ्वरक गाउँपालिका–४ की प्रमिलाले एक वर्ष अघि विजयसँग प्रेम विवाह गरेकी थिइन् ।

आर्थिक अवस्था कमजोर भएकी प्रमिलाको कोखबाट मङ्गलबार पाँचथर अस्पतालमा छोरीको जन्म भएपछि सुत्केरी सिवाको हेरचाह गर्ने मान्छेसमेत नभएपछि उनको बिचल्ली भएको हो । अहिले आमा र शिशु दुवैको अवस्था राम्रो रहेको स्वास्थ्यकर्मीहरुले बताएका छन् । सिवालाई झुक्याएर विजयले दोस्रो विवाह गरेपछि उनी पाँचथर थर्पुस्थित माइतीमा बस्दै आएकी थिइन् ।

विवाहपछि श्रीमान् र सासू–ससुरासँगै झापाको काकडभिट्टामा बस्दै आएकी प्रमिलाले श्रीमानको घरपरिवार र आफन्तजनबाट नै अन्तरजातीय विवाह गरेकै कारण दुव्र्यवहार र शारीरिक यातना खेप्नुपरेको सिवाले बताइन् ।

गएको पुस महिनामा श्रीमानले अर्कै केटीसँग दोस्रो विवाह गरेको र त्यसपछि आफूसँग सम्पर्कमा नरहेको उनले बताइन् । श्रीमान् वेपत्ता भएपछि घरका अन्य सदस्यको दुव्र्यवहार र शारीरिक यातना खप्न नसकेर आफू माइतमै बस्न थालेको उनको भनाइ छ । माइतीको समेत आर्थिक अवस्था कमजोर रहेकी प्रमिला अहिले जिल्ला अस्पताल फिदिमको प्रसूति गृहमा छिन् । उनको हेरचाहका लागि कोही छैनन् । आमा पनि शारीरिकरूपमा अशक्त र बुबा पनि वृद्ध भएका कारण प्रमिलाको बिजोग भएको छ ।

कक्षा आठमा अध्ययन गर्दा सिवा र लिम्बूबीच प्रेम सम्बन्ध सुरु भएर कक्षा ११ अध्ययन गर्दागर्दै उनीहरुको अन्तरजातीय विवाह भएको थियो । गर्भवती हुँदा सबैले बच्चा फाल्न आग्रह गरेपनि आफूले सन्तानलाई धर्ती देखाउने आशाले कसैको कुरा नमानेको उनले बताइन् । गाउँपालिकामा सहयोगको याचना गर्न जाँदा गाउँमा पैसा उठाएर गर्भपतन गराउनू भन्ने जवाफ आएको उनको भनाइ छ ।

‘अन्तरजातीय विवाह गरेकै कारण लिम्बूका फुपूहरुले दलित केटीसँग विवाह किन गरेको यसलाई छाडिदे, हामी अर्की केटी खोजिदिन्छौँ भनेपछि मलाई उहाँले छोड्नुभयो ।’ उनले भनिन् । दोस्रो विवाह गरेर श्रीमान बेपत्ता भएपनि उनले झिनो आशा राख्दै भनिन्, ‘छोरी जन्मिएकी छे, उसलाई हेर्न उसको बुबा जसरी पनि आउनुहुन्छ ।’

Loading...

वडा समाचारहरु

सम्बन्धित समाचारहरु