Breaking News

निर्मला हत्या प्रकरणः प्रदीप रावल पक्राउ परेसँगै अनुसन्धान साँधुरिएको प्रहरीको दावी

निर्मला हत्या प्रकरणः प्रदीप रावल पक्राउ परेसँगै अनुसन्धान साँधुरिएको प्रहरीको दावी

काठमाडौं– कञ्चनपुरकी १३ वर्षीया निर्मला पन्तको बलात्कार र हत्या प्रकरणको अनुसन्धान साँघुरिदै गएको प्रहरीले दावी गरेको छ । हत्या प्रकरणमा जोडिएको आरोपमा नेपाल प्रहरीको केन्द्रीय अनुसन्धान ब्यूरोले मंगलबार काठमाडौंबाट २२ वर्षका एक युवालाई नियन्त्रणमा लिएको थियो । प्रहरी उनै यूवामार्फत निर्मला हत्या प्रकरणको पटाक्षेप हुने विश्वासमा छ ।

चार जनाको डीएनए परीक्षण, २ सय ५० बढी व्यक्तिसँगको बयान, कल डिटेल रेकर्डको अध्ययन र आधा दर्जन अनुसन्धान समिति सक्रिय भएपनि चार महिनासम्म निर्मला हत्या प्रकरण रहस्यमै रह्यो । हत्यारा उम्काउन खोजिएको भन्दै सुरुदेखि नै आलोचनाको केन्द्रमा रहेको प्रहरीले मंगलबार काठमाडौंको महाराजगन्जबाट एक युवकलाई पक्राउ गर्यो । पक्राउ परेकोको नाम नखुलाएपनि प्रहरी निर्मलाको हत्यामा उनै सम्लग्न रहेको निश्कर्षमा पुगेको छ । स्पष्ट खुलाउन नचाहने प्रहरी अनुसन्धान भइरहेको बताउँछ ।

सिआईबीको उच्च स्रोतका अनुसार पक्राउ परेका प्रदीप रावलले अभियोग स्वीकार समेत गरिसकेका छन् । तर, दिलिपसिंह विष्टलाई जबरजस्त अपराधी करार गराउन खोजीपछि आलोचित बनेको प्रहरीले रावलको डीएनए परीक्षणका लागि पठाएको छ । डीएनए परीक्षणको रिपोर्ट तीन दिनमा आउने बताइएको छ ।

महेन्द्रनगरको एक वर्कसपमा काम गर्ने २२ वर्षीय प्रदीप निर्मलाको शव भेटिएको दिनदेखिनै वेपत्ता थिए । चार महिनासम्म भारतमा रहेका रावल केही दिनअघि मात्रै काठमाडौं आएको प्रहरीको दावी छ । सुरुवातदेखि नै शंका गरिएका रावलले पक्राउ परेपछि अभियोगसमेत स्वीकारेको दावी छ ।

प्रहरीले महानिरीक्षक सर्वेन्द्र खनालकै उपस्थितिमा रावलसँग बयान लिएको छ । उनकै बयानका आधारमा प्रहरी निर्मला प्रकरणमा अनुसन्धानको दायरा साँघुरिदै गएको निश्कर्षमा पुगेको हो । रावलकै बयानका आधारमा कञ्चनपुरबाट पक्राउ गरिएका केही यूवालाई पनि काठमाडौं ल्याइएको छ । तर, प्रहरीले पक्राउ परेका रावल र जारी अनुसन्धानबारे खुलाएको छैन ।

वडा समाचारहरु

सम्बन्धित समाचारहरु