Breaking News

श्रममन्त्री विष्टले भने– “सरकार समृद्ध नेपाल निर्माणको अभियानमा जुटेको छ”

श्रममन्त्री विष्टले भने– “सरकार समृद्ध नेपाल निर्माणको अभियानमा जुटेको छ”

काठमाडौं– श्रम, रोजगार तथा सामाजिक सुरक्षामन्त्री गोकर्ण विष्टले सरकार गरीबी, अभाव र बेरोजगारीबाट देशलाई मुक्त गर्दै समृद्ध नेपाल निर्माणको अभियानमा जुटेको बताएका छन् ।

बडादशैँ, तिहार, छठ तथा नेपाल संवत्का अवसरमा आज मन्त्रालयमा आयोजित शुभकामना आदानप्रदान कार्यक्रममा उनले नेपालीको श्रम र सीप नेपालकै विकासमा प्रयोग गरी समृद्ध नेपाल निर्माण गर्न सबै पक्ष एकजुट हुनुपर्ने बताए ।

मन्त्री विष्टले मुलुकमा पर्याप्त रोजगारीका अभावमा घर परिवार र मातृभूमिबाट टाढा परदेशी भूमिमा रहेका लाखौँ नेपाली रगत र पसिना बगाउँदै अत्यन्त जोखिमपूर्ण काम गर्नुपरेको स्मरणसमेत गरे ।

उनले भने, ‘दशैँमा आफ्नो घर आउने चाहना हुँदाहुँदै पनि कयौँ युवा घर फर्कन सक्नुभएको छैन । सरकार विदेशी भूमिमा नेपाली युवाले गरेको मेहनतलाई सम्मान गर्दछ । तपाईहरु स्वदेश फर्कदा जन्मभूमिमै श्रम गरी सम्मानजनक जीवनयापन गर्न पाउने गरी रोजगारीका अवसर वृद्धि गर्न सरकार क्रियाशील छ ।’

सबैले देश निर्माणमा योगदान गर्नुपर्ने बेला आएको बताउँदै उनले मरभूमिलाई हरियालीमा परिणत गर्ने पौरखी नेपाली हातले नेपाल बदल्न सक्ने विश्वास व्यक्त गरे । पारिवारिक पुनर्मिलनको दृष्टिले दशैँ निकै महत्वको चाड भएको उल्लेख गर्दै उनले नेपालका चाडपर्वले सबै नेपालीलाई एकताबद्ध बनाउन सहयोग पुर्याउने बताए ।

श्रमिक र सामाजिक न्यायको पक्षमा सञ्चारकर्मीले जनपक्षीय भूमिका निर्वाह गरेको बताउँदै मन्त्री विष्टले सञ्चारकर्मीले श्रमिकका पक्षमा निरन्तर आवाज उठाउनुपर्नेमा जोड दिए । रासस

वडा समाचारहरु

सम्बन्धित समाचारहरु