प्रधानमन्त्री ओलीको स्याउ मोह,मन तान्यो मनाङे स्याउले

''एउटै बगैंचामा ५ लाख किलो स्याउ''

प्रधानमन्त्री ओलीको स्याउ मोह,मन तान्यो मनाङे स्याउले

मनाङ — ङिस्याङ गाउँपालिका–१ भ्राताङस्थित ७ सय ३५ रोपनी जग्गामा फैलिएको स्याउ फर्म सम्भवतः देशकै ठूलो फर्म हो ।गत असोज १ गते तय भएको भ्रमण रोकेर बिहीबार हेलिकप्टरमार्फत  ङिस्याङ गाउँपालिका १, भ्राताङस्थित एग्रो मनाङ प्रालिले सुरु गरेको स्याउ खेती तथा स्याउ प्रशोधन केन्द्रको उद्घाटन गर्न प्रधामन्त्री केपी  शर्मा ओली मनाङ पुगेका हुन् ।

प्रधानमन्त्री  ओलीले बारीमा  लटरम्मै  फलेको  स्याउ सुम्सुम्याए । उनको मन स्याउबारीले तानेको उनको हाउभाउबाट स्पष्ट हुन्थ्यो । उनले भने, ‘मेरो मन स्याउले तान्यो । स्याउ देखेर म छक्क परें । यस्तो होला भनेर कल्पना पनि गरेको थिएन ।’ मनाङबाट निर्वाचित नेकपाका सांसद पोल्देन छोपाङ गुरुङलाई प्रधानमन्त्री ओलीले धन्यवाद समेत दिए ।

गुरुङले काठमाडौंको ठमेलस्थित चल्तिको होटल बेचेर स्याउमा लगानी गरिएको बताउँदै गर्दा उनले अश्चर्यसमेत ब्यक्त गरे । उनले थपे, ‘कृषि क्रान्तिको लागि गाउँ फर्किनु भएकोमा धन्यावाद ।’

प्रधानमन्त्री ओलीका धर्मपत्नी राधिका शाक्य, नेकपाका महासचिव विष्णु पौडेल, नेकपा संसदीय दलका उपनेता सुभासचन्द्र नेम्वाङ, प्रधानमन्त्रीका राजनीतिक सल्लाहकार विष्णु रिमाल, नेकपा संसदीय दलका प्रमुख सचेतक देवप्रसाद गुरुङ, गण्डकी प्रदेशका मुख्य मन्त्री पृथ्वीसुब्बा गुरुङ, कृषि तथा सहकारी मन्त्री चक्रपाणी खनालसहित पुगेका ओलीले स्याउ फार्मको भ्रमण गरे ।

 उनले सबै नेपालीले समृद्धिको सपना देख्नुपर्ने र आफ्नो ठाउँबाट यसको सुरुवात गर्नुपर्ने बताए । ‘दुर्गमका माटोमा गरिएको कृषि, यसले निम्त्याउने पर्यटक, रोजगारी र स्वदेशी स्याउ उत्पादनले आर्थिक समृद्धिसंग जोड्छ’ उनले भने, ‘कृषिलाई आधुनिकीकरण र व्यवसायीकरण गर्न सकिए समृद्धि खोज्न टाढा जानु पर्दैन ।’ सरकारले स्याउ खेती विकासका लागि आगामी वर्ष १ लाख विरुवा विदेशबाट झिकाउने र हिमाली जिल्लाहरु मनाङ, मुस्ताङ, कालिकोट र जुम्लामा वितरण गरिने बताए ।

एग्रो मनाङ प्रालिले ४ वर्षअघि स्थापना गरेको स्याउ बगैंचा ७ सय ३५ रोपनीमा फैलिएको छ ।

संस्थाका अध्यक्ष समराज गुरुङले स्याउ टिप्ने कार्य धमाधम भइरहेको बताए । उनका अनुसार स्याउलाई काठमाडौं, पोखरालगायत ठूला सहर पठाउन थालिएको छ । बगैंचामा फलेका गाला र गोल्डेन जातको स्याउ टिप्ने कार्य भइरहेको र फुजी जातको स्याउ पुरै नपाकेकाले केही सातापछि मात्रै टिपिने उनले बताए ।

उनका अनुसार बगैंचामा इटली र सर्भियाबाट वर्णशंकर (हाइब्रिड) जातका बेर्ना ल्याएर रापिएको थियो । गतवर्ष ३ सय टन स्याउ उत्पादन भएको बगैंचामा यसबर्ष करिब ५ सय टन स्याउ उत्पादन हुने प्रक्षेपण गरिएको छ । एग्रो मनाङका प्रवन्ध निर्देशक युवराज गुरुङले फार्ममा कार्यरत सबै कर्मचारी स्याउ टिप्न व्यस्त भएको बताए । स्याउलाई बजारसम्म पुर्‍याउने गरिएको उनले बताए । स्याउ छिपेपछि यसको ‘ग्रेड’ छुट्याएर फार्ममा रहेको कोल्ड स्टोरमा राखिएको र बजारको अवाश्यकता अनुसार पुर्‍याइएको बताए । हिमाली क्षेत्रहरुमा यसरी फर्म सञ्चालन गर्न सके निर्यात नै गर्न सकिने सञ्चालक गुरुङ बताउँछन् ।

वडा समाचारहरु

सम्बन्धित समाचारहरु